Heimsmeistaramót íslenska hestsins í Herning
Nú stendur yfir heimsmeistaramót íslenska hestsins í Herning í Danmörku. Þar keppa Íslendingar með stórglæsilegt lið hesta og knapa. Nítján þjóðir hafa keppnisrétt á mótinu og má búast við miklum fjölda gesta þá sjö daga sem það stendur yfir. Auk þess kynna íslensk fyrirtæki og hagsmunafélög í hestamennsku á Íslandi, íslenska hestinn, vörur sínar og þjónustu í íslenska tjaldinu sem Íslandsstofa hefur umsjón með. Heimsmeistaramótið er einn stærsti vettvangur íslenska hestsins um heim allan.
Þar er markmiðið að skapa áhuga á upprunalandi íslenska hestsins, miðla fróðleik til gesta, mynda tengsl og selja vörur og þjónustu sem tengist íslenska hestinum. Landsmótið á Hólum 2016 er kynnt og geta gestir keypt miða á mótið á góðum kjörum meðan á heimsmeistaramótinu stendur.
Í tjaldinu, sem kallað er Laufskálarétt, er leitast við að skapa létta stemmingu með því að bjóða gestum að hlusta á söng og harmonikkuleik auk þess sem boðið er upp á íslenskt góðgæti eins og hangikjöt, síld og rúgbrauð, lax og soðbrauð, pönnukökur og vöfflur.
Hægt er að fylgjast með fréttum af mótinu á samfélagsmiðlum, m.a. hjá Horse Plaza og Landssambandi hestamannafélaga. Á vefsíðu mótsins koma fram upplýsingar um dagskrá o.fl.