Fyrirtækin sem um ræðir voru Iceland Travel, Allrahanda, Icelandair og Hotels of Iceland en síðastnefnda er skrifstofa Foss- og Reykjavíkurhótela í Kína. Meðal þess sem starfsmenn kínveskra ferðaskrifstofa spurðu um á kynningunum voru einstaklings- og hópferðir, vegabréfsáritanir, valmöguleikar í flugtengingum til Íslands, ráðstefnuhald og hvataferðir.

 

 

Sendiráðið í Peking og Íslandsstofa, sem önnuðust kynningarnar, hafa nú unnið saman að því í rúmlega ár að kynna íslenska ferðaþjónustu fyrir kínverskum ferðaskrifstofum og neytendum. Markaðsstarfið hefur hingað til einskorðast við útgáfu kynningarefnis og þátttöku í ferðasýningum. Viðburðirnir í Chongqing og Peking gáfu tækifæri til að kynna Ísland sem áfangastað eitt og sér og þar gátu íslensku fyrirtækin átt fundi með kínverskum systurfyrirtækjum sínum eftir kynningarnar.

 

Í Chongqing átti Þorleifur Þór Jónsson, sem sér um fjarmarkaði í kynningarstarfi Íslandsstofu á íslenskri ferðaþjónustu, fund með vara-framkvæmdastjóra ferðamálastofu Chongqing. Menningar- og viðskiptafulltrúi sendiráðsins, Hafliði Sævarsson, skipulagði viðburðina fyrir hönd sendiráðsins.

Um 9000 kínverskir ferðamenn sóttu Ísland heim síðasta sumar samkvæmt talningu Ferðamálastofu á brottförum um Leifsstöð. Er það sjötíu prósenta aukning miðað við árið á undan. Vonir standa til að fjölga megi kínverskum ferðamönnum til Íslands enn frekar en hugur sífleiri Kínverja stendur til utanfara samfara auknum kaupmætti í landinu.