Mikil gleði ríkti á saltfiskhátíðinni sem haldin var dagana 17.-21. ágúst sl. í bænun Ílhavo í norðurhluta Portúgals. Dagskrá hátíðarinnar, sem er sú stærsta í Portúgal, var afar fjölbreytt og skipaði þátttaka Íslands stóran sess á hátíðinni. Íslenskur saltfiskur var áberandi og var þátttaka Íslands liður í markaðsverkefninu „Saltaðar þorskafurðir í Suður Evrópu“ sem Íslandsstofa hefur umsjón með en auk þess var landið kynnt almennt, sem áfangastaður ferðamanna, matarmenningin, nýsköpun og tónlist.  

Grindavíkurbær, sem er vinabær Ilhavo, tók þátt í hátíðinni og kynnti bæjarfélagið, náttúruperlur Reykjaness, notkun jarðhita, nýsköpun og Fisktækniskólann. Ragnheiður Elín Árnadóttir, iðnaðar- og viðskiptaráðherra, heimsótti hátíðina og tók virkan þátt í fjölbreyttri dagskrá á þjóðardegi Íslands þann 19. ágúst ásamt Þórði Ægi Óskarssyni, sendiherra Íslands gagnvart Portúgal. 

Tónlist, matreiðsla, vinnufundur o.fl. á þjóðardegi

Á Íslandsdeginum fór íslenska sendinefndin í heimsókn í háskólann í Aveiro og ræddi samstarf á sviði nýsköpunar, ferðamála o.fl. Á hátíðarsvæðinu var svo fánahylling við rauða Eldhúsið, opnuð ljósmyndasýning, tónleikar með íslensku hljómsveitinni Ylju, vinnufundur um samstarf milli landanna og vinabæjanna o.fl. Viktor Örn Andrésson matreiðslumeistari, fulltrúi Íslands í Bocus d‘Or matreiðslukeppninni 2017, sýndi matreiðslu á þorski og humri og kynnti einnig íslenska skyrið. Gestir fengu svo að gæða sér á því sem Viktor útbjó, auk þess að fá að smakka íslenskan bjór og annan íslenskan mat.

Ljósmyndasýning Pepe Brix vakti mikla athygli, en hann myndaði íslenska sjómenn og fiskvinnslur í heimsókn sinni til Íslands fyrri hluta árs.

Ferð til Íslands í vinning

Mikilll fjöldi gesta á hátíðinni tók þátt í getraun og í verðlaun var ferð til Íslands, íslenskur saltfiskur, svuntur merktar Bacalhau da Islândia, afurðir Bláa lónsins og landsliðstreyja fótboltalandsliðs karla. Gestir voru hvattir til að fylgjast með á Facebook síðu Bacalhau da Islândia og fjölgaði fylgjendum umtalsvert meðan á hátíðinni stóð. Ferðina til Íslands vann Alexandre Oliveira, búsettur í Porto. 

Mikil ánægja var með þátttöku Íslands á hátíðinni meðal samstarfsaðila í Portúgal, Íslendinganna og samstarfsaðila í Grindavík og í markaðsverkefninu. Á vinnufundi sem haldinn var um viðskiptatengsl og samstarf, voru reifaðar ýmsar hugmyndir um frekari samvinnu við Ísland og Grindavík um að kynna íslenska saltfiskinn, nemendaskipti, samstarf við veitingastaði, nýsköpun o.fl.