Árni Alvar Arason er nýr forstöðumaður fyrir svið útflutnings og fjárfestinga hjá Íslandsstofu. Árni mun leiða störf sviðsins og stýra uppbyggingu útflutningsþjónustu fyrir íslensk fyrirtæki.

Árni býr yfir mikilli þekkingu á íslenskum útflutningi og hefur umtalsverða reynslu af því að koma vörum íslenskra framleiðanda á markaði í Evrópu, Asíu og Norður Ameríku. Hann hefur yfir 20 ára reynslu sem framkvæmdastjóri hjá Össuri hf sem er eitt öflugasta útflutningsfyrirtæki landsins. Hann var meðal annars fjármálastjóri félagsins og framkvæmdastjóri sölu, markaðsmála og viðskiptaþróunar.  Þá leiddi hann sókn fyrirtækisins á erlenda markað og var ábyrgur fyrir því að byggja upp markaði í Evrópu, Asíu og Eyjaálfu þar sem Össur hefur nú náð sterkri stöðu. Hann var framkvæmdastjóri Össurar í Asíu á árunum 2006-2018.

Frá árinu 2019 hefur hann starfað í Þýskalandi sem sjálfstætt starfandi ráðgjafi, meðal annars fyrir íslensk fyrirtæki í uppbyggingarfasa.

Árni er með meistaragráðu í rekstrarhagfræði frá háskólanum í Trier í Þýskalandi og er með Post graduate diploma í rafrænni stjórnun frá Hyper Island Institute í Singapore. 

Árni Alvar Arason:
„Ég er mjög spenntur fyrir því að ganga til liðs við Íslandsstofu á þessum tímapunkti. Þær áherslubreytingar sem gerðar hafa verið í starfseminni eru áhugaverðar og metnaðarfullar.  Vaxtartækifæri Íslands eru mikil á hinum ýmsu sviðum en markið er sett á aukna nýsköpun sem hefur sjálfbærni og hringrásarhagkerfið að leiðarljósi.“

Pétur Þ. Óskarsson, framkvæmdastjóri Íslandsstofu:
„Það er sönn ánægja að bjóða Árna Alvar velkominn til Íslandsstofu. Hann er frábær viðbót við sterkan hóp. Það eru spennandi tímar framundan við að byggja upp nýja þjónustuþætti og efla enn frekar þjónustu okkar við íslensk útflutningsfyrirtæki. Ég er sannfærður um að þekking hans og reynsla af því að sækja á erlenda markaði á eftir að verða mikill fengur í þeim efnum, bæði fyrir Íslandsstofu og íslensk útflutningsfyrirtæki.“