Loading…
Íslandsstofa
Íslandsstofa
25. janúar 2019

Gullkarfinn heillar þýska neytendur

Gullkarfinn heillar þýska neytendur
Dagana 18-20. janúar stóð Íslandsstofa/ Iceland Responsible Fisheries fyrir kynningu á íslenskum gullkarfa á Grüne Woche, sem er stór matvæla- og landbúnaðarsýning sem fer fram árlega í Berlín.

Iceland Responsible Fisheries (IRF) var í samstarfi við Fisch-Informationszentrum (FIZ) á sýningunni og deildi bás með stofnuninni, sem hefur það markmið að stuðla að aukinni fiskneyslu í Þýskalandi. Þetta er í fjórða skipti sem IRF tekur þátt í Grüne Woche í samstarfi við FIZ.

Gullkarfa frá Íslandi var stillt upp í fiskborði og fiskurinn kynntur undir merkjum IRF og gátu gestir einnig fengið að smakka pönnusteiktan gullkarfa. Á meðal þeirra sem gæddu sér á karfanum var Julia Klöckner, landbúnaðarráðherra Þýskalands, en hún heimsótti básinn á fyrsta degi sýningarinnar ásamt miklum fjölda fjölmiðlafólks. 

Fulltrúi IRF/ Íslandsstofu dreifði kynningarefni um íslenskt sjávarfang og áfangastaðinn Ísland. Þá gafst gestum sem heimsóttu básinn tækifæri á að taka þátt í getraunleik og vinna „Íslandskvöldverð“ á Michelin veitingastaðnum FACIL í Berlín. 

Framleiðendur frá öllum heimshornum kynna afurðir sínar á Grüne Woche og eru sýnendur um 1.500 frá 65 löndum. Áætlað er að um 380.000 manns sæki sýninguna að jafnaði, mest almennir gestir en þar á meðal eru um 85 þúsund fagaðilar. Sýningin stendur yfir í 10 daga, eða frá 18.- 27. janúar.


Deila