Íslandsstofa var í dag valið markaðsfyrirtæki ársins 2016 af ÍMARK. Forseti Íslands, Guðni Th. Jóhannesson afhenti Jóni Ásbergssyni, framkvæmdastjóra Íslandsstofu verðlaunin við hátíðlega athöfn á Hilton Reykjavík Nordica. 

Í rökstuðningi dómnefndar kemur fram að „markaðsstefna Íslandsstofu sé trúverðug og sett fram með skýrum hætti. Unnar eru markaðsáætlanir í samstarfi við hagsmunaaðila þar sem unnið er út frá vel skilgreindum markmiðum.“

Verðlaunin eru veitt þeim fyrirtækjum sem þykja hafa skarað fram úr í markaðsmálum undanfarin tvö ár og náð árangri. ÍMARK hefur veitt Markaðsverðlaunin frá árinu 1991, en markmið verðlaunanna er að stuðla að aukinni fagmennsku í markaðsstarfi íslenskra fyrirtækja og er það dómnefnd á vegum ÍMARK sem velur fyrirtækin. 

Hér að neðan má sjá Jón Ásbergsson og Ingu Hlín Pálsdóttur, forstöðumann ferðaþjónustu og skapandi greina hjá Íslandsstofu, ásamt forseta Íslands og fulltrúum frá ÍMARK.