Samgöngumál í brennidepli á kaupstefnu á Grænlandi
Frá vinstri Pétur Ásgeirsson ræðismaður, Ulla Lynge framkvæmdastjóri Sermersoq business council, Árni Gunnarsson formaður GLÍS, Anders Stenbakken framkvæmdastjóri Visit Greenland, Helgi Már Björgvinsson, framkvæmdastjóri sölu- og markaðssviðs Icelandair, Mikael Højgard forstjóri Air Greenland og Gunnar Már Sigurfinnsson forstjóri Icelandair Cargo.
Fulltrúar íslenskra fyrirtækja sóttu kaupstefnu í Nuuk á Grænlandi dagana 26. og 27. október sl. Tilgangur ferðarinnar var að auka viðskiptatengsl milli landanna, en einnig að kynna íslenskar vörur fyrir grænlenskum almenningi. Þetta er fimmta árið í röð sem viðburðurinn fer fram.
Í dagskrá kaupstefnunnar kenndi ýmissa grasa. Fyrirtækin funduðu með grænlenskum samstarfsaðilum og boðið var upp á kynningar um samstarfsmöguleika landanna. Þannig kynnti Vittus Qujaukitsoq ráðherra utanríkis-, viðskipta og auðlindamála yfirgripsmiklar fyrirætlanir um að gera ferðaþjónustu einn af hornsteinum efnahagslífs á Grænlandi á fundi með hópnum á fimmtudag. Féll það efni vel að hádegisfundi sem haldinn var á föstudag þar sem samgöngumál voru í brennidepli og mörg áhugaverð erindi flutt.